ഇരിട്ടി: വി.ഡി.സതീശനെ മുഖ്യമന്ത്രിയാക്കാൻ കോൺഗ്രസ് പ്രവർത്തകന്റെ ശയനപ്രദക്ഷിണം. മാടത്തിൽ സ്വദേശി പി.വി.രാജനാണ് സതീശനെ മുഖ്യമന്ത്രിയാക്കണം എന്നാവശ്യപ്പെട്ട് ഇരിട്ടി ടൗണിൽ ശയനപ്രദക്ഷിണം നടത്തിയത്. പട നയിച്ചവൻ മുഖ്യമന്ത്രിയാവട്ടെ എന്ന പ്ലക്കാർഡുമായാണ് കോൺഗ്രസ് പ്രവർത്തകനായ രാജൻ ശയനപ്രദക്ഷിണം നടത്തിയത്.
കോൺഗ്രസ് ബൂത്ത് വൈസ് പ്രസിഡന്റാണ് പി.വി.രാജൻ. ഇരിട്ടി ബ്ലോക്ക് കോൺഗ്രസ് ഓഫീസിന്റെ മുന്നിലെ റോഡിലായിരുന്നു രാജന്റെ വേറിട്ട പ്രകടനം. ജനങ്ങളുടെ ആവശ്യം നേതാക്കളെ അറിയിക്കുകയായിരുന്നു എന്നാണ് ഇദ്ദേഹത്തിന്റെ നിലപാട്.
കഴിഞ്ഞദിവസം കോൺഗ്രസിന്റെയും മുസ്ലിം ലീഗിന്റെയും നേതൃത്വത്തിലുള്ളവരും പ്രവർത്തകരും ഇരിട്ടിയിൽ വി.ഡി.സതീശനുവേണ്ടി പ്രകടനം നടത്തിയിരുന്നു. കെ.പി.സി.സി പ്രസിഡന്റ് സണ്ണി ജോസഫ് കെ.സി.വേണുഗോപാലിനൊപ്പമാണെന്ന വാർത്ത ഉണ്ടായതും ഒരുവിഭാഗം യു.ഡി.എഫ് പ്രവർത്തകരിൽ അമർഷം ഉണ്ടാക്കിയിരുന്നു.
